12 сентябрҙә Рәсәйҙең эҙәрмәндәр хәрәкәте активистары ҙур һәм бик мөһим ваҡиғаны — Рәсәй Геройы Максим Серафимов исемендәге «Патриот» паркында «Геройҙар территорияһы» патриотик слетын үткәреүҙә ҡатнашты.
Был көндө Башҡортостан Башлығы Радий Хәбиров слетта ҡатнашыусылар — 6 йәштән 14 йәшкә тиклемге һаулыҡ мөмкинлектәре сикләнгән малайҙар менән шәхсән осрашты. Сараға республиканың бөтә төбәктәренән, шул иҫәптән махсус хәрби операцияла ҡатнашыусыларҙың ғаиләләренән 132 бала, шулай уҡ уларҙың ата-әсәләре һәм волонтерҙар килде. Был киң ҡоласлы сараны «Бәхет территорияһы» хәйриә фонды Башҡортостандың Мәғариф министрлығы һәм Ғаилә, хеҙмәт һәм халыҡты социаль яҡлау министрлығы менән берлектә ойошторҙо.
Республика Хәрби Дан музейы менән берлектә беҙ интерактив майҙансыҡ әҙерләнек һәм үткәрҙек. Балалар һәм уларҙың ата-әсәләре махсус хәрби операцияға арналған күргәҙмәбеҙҙе ҡарай алды, шулай уҡ ҡыҙыҡлы уйындарҙа ҡатнашты.
Бигерәк тә Каринэ Владимир ҡыҙы Хәбированың беҙҙең «Сапёрҙар» уйынын уйнаған мәле иҫтә ҡалды. Слет уның — «Бәхет территорияһы» хәйриә фондының Попечителлек советы рәйесе булараҡ — патронажы аҫтында үтте һәм уның шәхси ҡатнашыуы беҙҙең барыбыҙ өсөн дә бик ҡиммәтле.
Көн программаһы ифрат бай булды: оҫталыҡ дәрестәре, экскурсиялар, музыкаль сығыштар, билдәле кешеләр менән осрашыуҙар, ата-әсәләр өсөн брифинг һәм хатта ысын авиашоу. Бындай саралар үҙенсәлекле балаларҙы социалләштереүҙә ҙур роль уйнай. Улар балаларға донъяға ҡарашын киңәйтергә, яңы дуҫтар табырға, үҙ көсөнә ышанырға, йәмғиәттең иғтибарын һәм ярҙамын тойорға ярҙам итә.
«Поиск» отряды командиры Олег Желтовҡа күргәҙмәне ҡуйыуҙа һәм майҙансығыбыҙҙы ойоштороуҙа күрһәткән баһалап бөткөһөҙ ярҙамы өсөн айырым һәм ҙур рәхмәтемде белдерәм.
Беҙ кешеләргә файҙа килтерә алыуыбыҙ һәм уларға яҡты тойғолар бүләк итеүебеҙ менән ғорурланабыҙ.
